2004-cü ildən ABŞ Ticarət və İnkişaf Agentliyi vasitəsilə Azərbaycana ÜTT-yə üzvlük üzrə tədbirlərin həyata keçirilməsi üçün 3 mln. dollarlıq texniki yardım göstərilib.
“ABŞ hökuməti Azərbaycanın ÜTT-yə üzvlüyünü tam dəstəkləyir”, deyə bu gün “Azərbaycanın ÜTT-yə üzvlüyü: mövcud vəziyyət və perspektivlər” mövzusunda keçirilən seminarda ABŞ-ın Azərbaycandakı səfirinin müavini Don Lu bildirib. Seminar ABŞ Beynəlxalq İnkişaf Agentliyi (USAID) tərəfindən təşkil olunub. 2004-cü ildən ABŞ Ticarət və İnkişaf Agentliyi vasitəsilə Azərbaycana ÜTT-yə üzvlük üzrə tədbirlərin həyata keçirilməsi üçün 3 mln. dollarlıq texniki yardım göstərilib. Bu il USAID əlavə 3,7 mln. dollar yardım ayıracaq. Don Lunun sözlərinə görə, hazırda dünya ticarəti və xidmətlərinin 90%-i ÜTT-yə üzv ölkələr tərəfindən həyata keçirilir və Azərbaycanın bu təşkilatdan kənarda olması ölkə iqtisadiyyatına neqativ təsir göstərə bilər. Seminarda çıxış edən Azərbaycanın xarici işlər nazirinin müavini, ÜTT-yə üzvlük komissiyasının sədr müavini Mahmud Məmmədquliyev bildirib ki, Azərbaycan ÜTT-yə üzv ölkələrlə iki və çoxtərəfli danışıqları davam etdirir və artıq bir neçə ikitərəfli saziş imzalanıb. 40-a yaxın qanunvericilik aktı ÜTT-yə üzv ölkələrin qanunları ilə uyğunlaşdırılıb və 10-dan artıq qanun hazırlanaraq nəzərdən keçirilmək üçün hökumətə təqdim olunub. USAID-in ÜTT məsələləri üzrə eksperti Y. Fərhat “ÜTT-nin prinsipləri, ÜTT-yə üzvlük istiqamətində digər ölkələrin təcrübələri və üzvlüyün ölkəyə təsiri” məruzəsi ilə çıxış edib.