Dünən «N-brothers» qrupunun ad günü oldu. Bakı restoranlarının birində özünə ad günü keçirən qrupun tədbirinə gedərkən «TrendLife» maraqlı hadisənin şahidi oldu. Hələ konsert proqramı başlamamış, bura 800 nəfər insan toplaşmışdı. Bir anlıq düşündük ki, yəqin səhv ünvana gəlmişik. Namiq qardaşı görən kimi rahatlaşıb, ona suallar verməyə başladıq.
- Burda nə baş verir? Hələ konsert başlamayıb, millət artıq şənlənir.
- Bu qrupun məşhurluğundan xəbər verir. Görürsünüz, nə qədər qonaq var. Biz heç kimi dəvət etməmişik. Sadəcə, TV-də üç gün reklamımız gedib. Biz düşünürdük ki, bu bayramı dostlar arasında qeyd edək. Görürsünüz də…
Bayram saat 21:00-də başladı. Azər Axşamın çıxışından sonra səhnəyə tədbirin səbəbkarları çıxdılar. Gənclər oynadılar, oxudular. Daha sonra Namiq qardaşın «Can bala» adlı yeni qrupu səhnəyə çıxdı. Bu qrup iki oğlan və bir qızdan ibarətdir. «Bu mənim yeni layihəmdir və inanıram ki, layihələrim davamlı olacaq. Əsl prodüser öz profsionallığını göstərməlidir. Nə üçün Maks Fadeyevin beş qrupu olsun, məndə olmasın? Mənim şəxsi prodakşnım, qurğularım, yaxşı mütəxəssislərim var. Şərait varsa, inkişaf edib, irəliləmək lazımdır. Gələcəkdə isə qızlardan ibarət rəqs qrupu da yaratmaq fikrindəyəm.
- Nəyə görə əvvəllər «N-brothers» qrupunda dörd, indi isə üç ifaçı var?
- Yeri gəlmişkən, əvvəl üç ifaçı vardı. Sonra dörd oldu. Uşaqlar gəlir, gedir, lakin qrupun səviyyəsi dəyişmir. Hər yerdə bizi çox yaxşı tanıyırlar. Bizi sevir, hörmət edirlər.
Onları təbrikə qrupun eks üzvləri Xalid və Vüsal da gəlmişdilər. Hazırda onlar özlərinin solo karyeralarını qururlar. Daha sonra tədbirə müğənni Zamiq, Natəvan, Lalə Məmmədova, Xuraman Şuşalı, Rəşad İlyasov və başqaları da qoşuldular. Gecənin sonunda- 00:30-da rəqs meydançasında dava düşdü. Lakin tezliklə hər şey yoluna qoyuldu və gənclər gecə yarısına qədər əyləndilər.
