Müğənni Rəqsanə bu gün ANS TV-nın efirində “Xoş vaxt” verilişində aparıcı Nisə Qasımovanın qonağı olub. O, bir müddət əvvəl anası və bacısı barədə yayılan xəbərləri təkzib edib və bu xəbərləri sadəcə olaraq dedi-qodu adlandırıb: «Mən hər şeyin sonunu gözləyirəm. Mən hər şeyi qanun yoluna buraxmışam. Əgər qohumlarımdan birinin səhvi olubsa, qanun qarşısında hər kəs öz cavabını verməlidir». Müğənni bildirib ki, baş verənlər ona qarşı qurulmuş oyundur.
Veriliş zamanı Rəqsanə kövrəlib və birbaşa yayımda ağlayıb. Bütün veriliş boyu ağlayan və həmişəkindən fərqli olaraq bu dəfə qapalı geyimdə olan Rəqsanə namaz qılacağını söyləyib. O, deyib ki, Ramazan ayı ərzində tamamilə qapalı geyinəcək və namaz qılacaq. Ramazan ayından sonra da o, daim namaz qılacağını vurğulayıb. Daha sonra o, “Dostum” mahnısını ifa edib və özünə dəstək olanlara və onu bu günə gətirən insanlara təşəkkür edib.
Xatırladaq ki, Daxili İşlər Nazirliyinin rəsmi saytında Rəqsanənin anası və bacısının insan alveri ilə məşğul olmaqda təqsirli bilinərək həbs olunduğu barədə xəbər verilmişdi. Müğənni isə həmin şəxslərin adlarının sadəcə olaraq onun qohumları ilə oxşar adda olduğunu bildirmişdi.
